సమస్యాపూరణం

శ్రీ కంది శంకరయ్య గారు నిర్వహిస్తున్న శంకరాభరణం బ్లాగులో ఇటీవల నేను చేసిన పూరణలు.

ఆ.వె.	జడలు ముడియ గట్టి జపమాల చేబట్టి దొంగ స్వామి నగరి దూరి నంత చేరె చక్రధరుని చెల్లియే తనచెంత కాంతఁ జూచి మౌని కన్ను గొట్టె
కం.	మిడిమేళపు దొర యొక్కడు కడ గ్రేడు సిమెంటు వాడి కట్టగ డ్యామున్ నడిరేయి గండి పడెనట గొడుగెందుకు కుంభవృష్టి గురిసెడి వేళన్!
కం.	ఏమూలో దాగిన కవి సాముగరిడి చేసె కంది శంకరు మహిమన్ ఆ మాన్యు ప్రోద్బలము చే పామరుఁడే కవిగ మారి ప్రస్తుతు లందెన్.
కం.	హవ్వా యనగను సిబియై చివ్వున బోఫార్సు కేసు చీపుగ మార్చెన్ ఇవ్విధమగు శోధనమున పువ్వులు రాళ్ళగును, రాళ్ళు పూలుగ మారున్
తే.గీ.	రైతు మరచిన హైటెక్కు రాజకీయు డతని నోడించి నొక 'దేవు' కందల మిడ వేల కోట్లతో పుత్రు కుబేరు జేసె పామునకు బాలు వోసిన ఫలిత మిదియె?
కం.	తానధికారము నుండగ ఏనాడూ కానలేదు ఈయన రైతున్ కానగ రైతులపై అభి మానమ్మే లేనివాఁడు మాన్యుం డయ్యెన్.
ఆ.వె.	దారి తప్పుటెల్ల తప్పుకాదెచటను దారి మరచినంత తప్ప నగును దారి వెతికి వెతికి దరిజేరకున్నను దారి తప్పు వాడు; ధర్మ విధుడు
తే.గీ.	వీధివీధిలో భిక్షకై వేడుకొనగ దొరకలేదెట నొక రొట్టె తునకయైన కోర మృష్టాన్నమును; సద్ది కూడు, గొడ్డు కార మొసఁగు జల్లదనము కన్నుఁ గవకు
కం.	లడ్లా స్వీట్లవి పడదుర గ్రుడ్లా వద్దుర అరుగవు కుక్షికి బరువై గుడ్లను కన్నీరు దిరుగు ఇడ్లీలే చాలు మనకు నితరము లేలా?
కం.	మర మనుషుల కాలంబున తెరువరియై మనిషి జేయ దీటుగ క్లోనింగ్ అరయగ నచ్చెరువెందుకు? "సొర చెట్టున బీరకాయ సొంపుగఁ గాచెన్"
తే.గీ.	పరమ గురువు నిత్యానంద బాబ యైన కల్కి భగవానుడని చెప్పు కపటుడైన తనకు కోర్కెలు కలిగి సందడిని చేయ యతి విటుఁడు గాకపోవునే యతివ బిలువ.
కం.	ఓదార్పు యాత్రలనుచును గోదాలో దిగిన జగను కొంపల పైనన్ సోదా జరుగునని తలచి ఆదాయపు పన్నుఁ గట్టె నచ్చెరు వొందన్.
కం.	భాషించడు దుర్భాషలు ద్వేషించడు వెనుక గొయ్యి తీసెడు జనులన్ దోషుల గాంచుచు పలుకక రోషమ్మును వీడు వాడె రోషయ్య యగున్
కం.	ఓదార్చెద నేనంచును ఓదారుపు యాత్ర చేయ నొక్కడు వెడలెన్ 'ఓదార్పు' పదవి కైనను ఓదార్పులు సేయువాని కోరిమి లేదే!
కం.	వినినంత జనులు ఆగక తనగొప్పలు చెప్పి చెప్పి దంచుచు ఊకన్ జనులను ఊదర గొట్టగ వినువారికి చెప్పువాఁడు వెధవగఁ దోచున్.