చీకటివెలుగులు

ఈ మధ్య నేను కంది శంకరయ్య  గారి శంకరాభరణం  బ్లాగులో పూరించిన సమస్యలు. ఎరుపు వర్ణంలో చూపిన వరుస కంది శంకరయ్య గారిచే ఇవ్వబడిన సమస్యగా గుర్తించ గలరు. కం.  మేలగు నాయకులెవ్వరు చాలక డబ్బది యొసగెడి సైతానైనా చాలను మన వోటరు పా పాలే సజ్జనుల నెల్ల బతితుల జేయున్! తే. గీ. చీమ పెరుగన్నమును తిని సేదదీరె నంత లోపుగా జరిగెను వింత యొకటి చీమ తుమ్మెను, బెదరెను సింహగణము అదిరిపడి నిద్ర మేల్కొనెనంత చీమ! తే. గీ. స్వర్ణ సింహాసనమ్మున శ్వాన మమరి దేశమాతనే చేజార్చె దేహి యనుచు తిరిగి స్వాతంత్ర్యమును తెచ్చె ధీరజనులు స్వర్ణ సింహాసనమ్మున శ్వాన మమరె! తే. గీ. బియ్యమును కొంద మనుకున్న భయ్యమయ్యె కూరగాయల కొనుమాట నేరమయ్యె ఉల్లిపాయల ధరజూడ ఉట్టి పైన వచ్చె సంక్రాంతి లక్ష్మి యే మిచ్చె మనకు? ఆ. వె. కాలు ముడిచి పట్టి కాసారమున నిల్చు కొంగ కానుపించె కుంటివోలె కుక్క వెంటపడగ కొంగ పరుగులెత్తె కొంగ కైదు కాళ్ళు కోడికి వలె. ఆ. వె. మకరజ్యోతి గాంచ సౌకర్యములులేని శబరిమలకు వెడలి జనులు చావ పన్నువేయు ప్రభుత పనితీరు మారదు కస్తురి తిలకమ్ము గరళ మయ్యె! తే. గీ. వందకోట్ల జన...

ఈమధ్య నేను శంకరాభరణం  బ్లాగులో చేసిన కొన్ని సమస్యా పూరణలు. కం  పలుగాకులు కలహించగ కలహము వలదంచు చెప్ప; కాకులు తమతో కలహించి గాయ పరచగ కలహంసల తప్పు గాక గాకుల తప్పా! తే గీ  షార్టు మెస్సేజి లోతాను స్మార్టు యనుచు అసలు మోబైలు మాటలే నమృత మనుచు బైకు నడుపు వేళ 'నమృతపాన' మంద అమృతపానమ్ము మరణమ్ము నందఁ జేసె. తే గీ  అక్క చెల్లెండ్రు పాడిరి నొక్క పాట చెల్లి మగని వారడిగిరి చివర గాను గొప్పగాపాడె నెవ్వరో చెప్ప మనుచు 'చెల్లి' యని మగఁడు పిలువఁ చెలియ మురిసె. ఆ.వె. పడతి ఫాలభాగ వైశాల్యమును గాంచ ఆకసమ్ము తానె ఆగ్రహించె భ్రమసె తనను వీడి భామ ముంగురులలో సూర్యబింబ మమరె సుదతి నుదుట! ఆ.వె. పశువు నేమరించి పాలను కాజేసి దూడ గడ్డి మేప దోషమవదె? నోరులేని ప్రాణి నోటికూడు గుడిచి పాల వలన జనులు పతితులైరి . కం  కోరిన పడతుల చేతలు నేరము లైనను సరసపు నీతిగ దోచున్ కోరిక మెయి దహియింపగ కారము లేనట్టి కూర గాంతుడు మెచ్చెన్

శ్రీ  కంది శంకరయ్య గారు నిర్వహిస్తున్న శంకరాభరణం బ్లాగులో ఇటీవల నేను చేసిన పూరణలు. ఆ.వె. జడలు ముడియ గట్టి జపమాల చేబట్టి దొంగ స్వామి నగరి దూరి నంత చేరె చక్రధరుని చెల్లియే తనచెంత కాంతఁ జూచి మౌని కన్ను గొట్టె కం. మిడిమేళపు దొర యొక్కడు కడ గ్రేడు సిమెంటు వాడి కట్టగ డ్యామున్ నడిరేయి గండి పడెనట గొడుగెందుకు కుంభవృష్టి గురిసెడి వేళన్! కం. ఏమూలో దాగిన కవి సాముగరిడి చేసె కంది శంకరు మహిమన్ ఆ మాన్యు ప్రోద్బలము చే పామరుఁడే కవిగ మారి ప్రస్తుతు లందెన్. కం. హవ్వా యనగను సిబియై చివ్వున బోఫార్సు కేసు చీపుగ మార్చెన్ ఇవ్విధమగు శోధనమున పువ్వులు రాళ్ళగును, రాళ్ళు పూలుగ మారున్ తే.గీ. రైతు మరచిన హైటెక్కు రాజకీయు డతని నోడించి నొక 'దేవు' కందల మిడ వేల కోట్లతో పుత్రు కుబేరు జేసె పామునకు బాలు వోసిన ఫలిత మిదియె? కం. తానధికారము నుండగ ఏనాడూ కానలేదు ఈయన రైతున్ కానగ రైతులపై అభి మానమ్మే లేనివాఁడు మాన్యుం డయ్యెన్. ఆ.వె. దారి తప్పుటెల్ల తప్పుకాదెచటను దారి మరచినంత తప్ప నగును దారి వెతికి వెతికి దరిజేరకున్నను దారి తప్పు వాడు; ధర్మ విధుడు తే.గీ. వీధి...

పదో తరగతి చదివేటప్పుడు తెలుగు టీచర్ అనంతాచార్యుల వారు చందస్సు నేర్పించారు. ఆ సందర్భంగా  ఆటవెలది పద్యాన్ని బోధిస్తూ, ఒక పద్య పాదాన్ని ఇచ్చి పూరించమని చెప్పారు. అది... 'ఆట వెలదు లెల్ల నాటాడు నప్పుడు' చందస్సు నేర్చుకున్న ఆనందంతో సమధికోత్సాహంతో ఇలా పూరించాను.  ఆ. వె. ఆట వెలదు లెల్ల నాటాడు నప్పుడు పాడునపుడు మనము పరవశించి  మేను పులకరించి మేఘ మధ్యంబునం దాటలాడుచున్న యట్లు దోచు తర్వాత ఇంగ్లీషు మీడియం చదువు, సాంకేతిక విద్య కావడంవల్ల పద్యాల గురించి పూర్తిగా మరిచే పోయాను. మళ్ళీ ఇలా బ్లాగులోకం లోకి వచ్చిన తర్వాతనే పద్యాలు రాయడానికి ప్రయత్నం చేశాను. చింతా రామకృష్ణా రావుగారి ఆశీర్వచనం, ఆచార్య ఫణీంద్ర గారి వద్ద శిష్యరికం, కండి శంకరయ్య గారి ప్రోత్సాహం లేకుంటే జీవితంలో మళ్ళీ ఎప్పుడూ పద్యం రాసి ఉండే వాడిని కాదంటే అతిశయోక్తి కాదేమో. ఈ సందర్భంగా వివిధ బ్లాగులలో నేను వ్రాసిన కొన్ని పద్యాలు. ఆ. వె. ఆశ లేని బ్రతుకు అడవిలో వెన్నెల ఆశ యందె కలుగు ఆశయములు ఆశ యుండు టెల్ల అత్యాశ కాబోదు ఆశ లోనె కలదు దేశ భవిత చం. సరుకులు కొందమన్న మరి చాలవు జీతపు డబ్బు లేటికిన్ తిరుగుద మన్న రోడ్...

ఆంధ్రామృతం బ్లాగులో పెద్దలు చింతా రామకృష్ణారావు గారు ఇచ్చిన సమస్య "క్షామము బ్రోచుచుండుటనె గౌరవ మొందుట; సత్యమిద్ధరన్"    కి నేను చేసిన పూరణం. ఉ. 'సీమ'ను క్షామ మెక్కువని చెప్పుచు కొందరు; కాదు కాదు మా సీమన క్షామ మెక్కువని చెప్పెద రింకొక ప్రాంత నాయకుల్; క్షామము తాండవించుటకు కారణ మౌదురు, ఓటు కింత శి క్షా? మము బ్రోచుచుండుటనె గౌరవ మొందుట; సత్యమిద్ధరన్.

ఆ. వె. ఆశ లేని బ్రతుకు అడవిలో వెన్నెల ఆశ యందె కలుగు ఆశయములు ఆశ యుండు టెల్ల అత్యాశ కాబోదు ఆశ లోనె కలదు దేశ భవిత

కం. ఓదార్పు యాత్ర చేసెను రాదారులు తిరిగి తిరిగి రాజన్న కథల్ వేదాల వోలె చెప్పుచు గోదాలో నిలిచె జగను కుర్చీ కొరకై!  

పది రూపాయల నోటుతో నిపుడు ఏపూ టైన నిండే న కు క్షి ది గ్రేట్ సీయము రాజశేఖరుడు సాక్షాత్తూ ప్రజాబద్దుడై ఇదిగో ఇచ్చెను రెండు రూకల కిలో బియ్యం సరే పోయె ము ప్పది రూపాయలు సన్న బియ్యమన కంపం బెత్తి రాంధ్రా ప్రజల్