పద్యాలు: సమస్యా పూరణం

ఈ మధ్య నేను కంది శంకరయ్య గారి శంకరాభరణం బ్లాగులో పూరించిన సమస్యలు.

ఎరుపు వర్ణంలో చూపిన వరుస కంది శంకరయ్య గారిచే ఇవ్వబడిన సమస్యగా గుర్తించ గలరు.

కం.	మేలగు నాయకులెవ్వరు చాలక డబ్బది యొసగెడి సైతానైనా చాలను మన వోటరు పా పాలే సజ్జనుల నెల్ల బతితుల జేయున్!
తే. గీ.	చీమ పెరుగన్నమును తిని సేదదీరె నంత లోపుగా జరిగెను వింత యొకటి చీమ తుమ్మెను, బెదరెను సింహగణము అదిరిపడి నిద్ర మేల్కొనెనంత చీమ!
తే. గీ.	స్వర్ణ సింహాసనమ్మున శ్వాన మమరి దేశమాతనే చేజార్చె దేహి యనుచు తిరిగి స్వాతంత్ర్యమును తెచ్చె ధీరజనులు స్వర్ణ సింహాసనమ్మున శ్వాన మమరె!
తే. గీ.	బియ్యమును కొంద మనుకున్న భయ్యమయ్యె కూరగాయల కొనుమాట నేరమయ్యె ఉల్లిపాయల ధరజూడ ఉట్టి పైన వచ్చె సంక్రాంతి లక్ష్మి యే మిచ్చె మనకు?
ఆ. వె.	కాలు ముడిచి పట్టి కాసారమున నిల్చు కొంగ కానుపించె కుంటివోలె కుక్క వెంటపడగ కొంగ పరుగులెత్తె కొంగ కైదు కాళ్ళు కోడికి వలె.
ఆ. వె.	మకరజ్యోతి గాంచ సౌకర్యములులేని శబరిమలకు వెడలి జనులు చావ పన్నువేయు ప్రభుత పనితీరు మారదు కస్తురి తిలకమ్ము గరళ మయ్యె!
తే. గీ.	వందకోట్ల జనులు గూడి భరత భువిని ఎన్నికల లోన గెలిపించి రెవరు వారు? వారు మగ, ఆడ కానట్టి వారు; చూడ భీష్ముఁడు శిఖండిని వరించి పెండ్లియాడె!
కం.	నవలోకపు అభిరుచులను అవగాహన చేసికొమ్ము అతివా చూడన్ చవకే నైటీ; చీరయు రవికెందుకు నీకు తరుణి రాతిరి వేళన్?
ఆ. వె.	పగలు రాత్రి లేక ప్రాజెక్టు పనులంటు మాట మంతి లేక మనసు గలిపి అయిపు లేక వెడలె అంకోపరిని బట్టి సాఫ్టువేరు మగని జాడఁ గనరె!
కం.	క్రొత్తల పండుగ కొరకై దుత్తను బెట్టిన పలలము దొంగిలి తిని; మే నత్తకు జెప్పెను మావటి "మత్తెక్కిన భద్రగజము మాంసముఁ దినియెన్". పై పద్యం అర్థం కానివారికోసం వివరణ: రైతులు పంట నూర్పిళ్ళు జరిగినాక, ఇంటికి తెచ్చే ముందు పొలంలోనే చిన్న పండగ (క్రొత్తలు) చేస్తారు. క్రొత్త బియ్యంతొ పసుపన్నం వండి, మాంసంతొ గ్రామ దేవతకు ముందు నైవేద్యం పెడతారు. ఆ క్రమంలోనే ఒకావిడ నైవెద్యంకోసం మాంసం, అన్నం వండి, ఏదో పని రావడంతో పొలంలోకి వెళ్ళింది. ఈలోపు మావటిగా పని చేసే మేనల్లుడు ఏనుగెక్కి అటుగా వచ్చాడు. మాంసం వాసన చూసేసరికి తినాలనే ఆశ పుట్టి, మొత్తం తినేశాడు. ఇంతలో అత్త రానేవచ్చింది. సమాధానం ఏం చెప్పాలో తెలియని అల్లుడు చివరికి పై విధంగా తిక్క సమాధానం చెప్పాడు!
ఉ.	ఉత్పలమాల లల్లమని ఊరక జెప్పరు శంకరార్యు లా ఉత్పలమాల కుండవలె నో యతి నాల్గవ యక్షరమ్ముతో; ఉత్పతనమ్ము నోపుదును, ఉత్పలమాలను ఎట్లు రాతు? నే యుత్పలమాల యందు యతి యొప్పును నాల్గవ యక్షరమ్ముతో?
కం.	ఇలనష్టా వకృండట తలలైదు కరంబులారు తనువది యొకటే! తెలుపగ వైద్యులు వివరము తలచితి నది జన్యులోప దైహికమనుచున్
కం.	చూడగ మనసున దోచును గాడిదలకుఁ దెలియు కుసుమ గంధపు విలువల్; గోడకు వేసిన పోస్టరు వీడదు కత్రినది యైన బిరబిర దినగన్!
కం.	అడుగగ ఫీజుల కిచ్చితి కొడుకునకున్ వేనవేలు; కూఁతున కొకటే బిడియము, అడగదు ఏమీ; వెడలెద నేనే బడికిని వివరము లడుగన్.
కం.	ఒద్దని వారంటున్నను మద్దతు నిచ్చెద నటంచు మరిమరి యనుచున్ ప్రొద్దులు పుచ్చుచు గడిపెడు దద్దమ్మల కీజగత్తు దండుగ కాదా?
ఉ.	కోరరు డబ్బు దస్కములు కోరరు ఇంపగు విందు బోనముల్ కోరరు రాజ్య సంపదలు కోరరు మెత్తని పట్టు వస్త్రముల్ కోరరు మద్య మాంసములు కోరెద రొక్కటి మెచ్చుకోలు కై బారులు; లేనిచో కవులు బావురు మందురు లోకమందునన్.
తే. గీ.	విద్య నేర్చినవాఁడె పో వింతపశువు అన్న పశువు బాధ పడుచు విన్నవించె తాను సేవించు నీతిని తప్పకుండ నేటి ఆస్థాన సచివుల నీతి గనరె!
కం.	చర్యకు తప్పక దగు ప్రతి చర్య గలుగు; కావలసిన సంతకమునకై కార్యార్థి మంత్రి వర్యుని భార్యకు బ్రణ మిల్లె భక్తి భావము గుదురన్!
కం.	నరుడైనను కరియైనను ఖరమైనను జీవులెల్ల కాటికి వెడలన్ హరి గలియు నంచు నొక్కడు ఖర నామము సుతున కొసఁగెఁ గడు మోదమునన్.
కం.	ప్రతిదినము వరుస దప్పక వ్రతములు జరిపించు వాడు వర్జ్యము రాగా క్రతువు ముగించి చివరి హా రతికై సోదరిని వేగ రమ్మని పిలిచెన్.
ఆ. వె.	దున్న ఒకటి వచ్చి తిన్నదనుచు గడ్డి పార్కు గార్డు వచ్చి బాదుచుండ పద్యకవిత నాపి వచ్చి కాపాడగ దున్న 'హరి'ని జూచి సన్నుతించె.