రాక్షస సంహారం పూర్తయిందా?

మతోన్మాదాన్ని నిండుగా తలకెక్కించు కుని రాక్షసత్వాన్ని సంతరించుకున్న ఒక మహా క్రూరుడు చివరకు హతమయ్యాడు. రాక్షసుడు మరణించి నందుకు పండుగలు చేసుకుందామా? నిజమే, చేసుకోవచ్చు. ఒక వేళ ఆ రాక్షసుడిని సంహరించింది ఒక అవతార పురుషుడైతే అలాగే సంతొషించ వచ్చు. ఇకపై శాంతి వెల్లివిరుస్తుందని ఆశించవచ్చు. 

కానీ వాణ్ని అంతకంటే మదించిన ఇంకో బ్రహ్మరాక్షసుడు సంహరించితే సంతొషించడానికి ఏం వుంటుంది? రాక్షసుడు సంహరించ బడ్డందుకు సంతోషించాలా, లేక బ్రహ్మరాక్షసుడిని ఇక ఏమాత్రం ఎదురొడ్డే వాడు లేడని భయపడాలా? ఈ క్షణం ప్రపంచం లోని ఆలోచనా పరులను వేధిస్తున్న ప్రశ్న ఇదే.

అసలు ఈ రాక్షసుణ్ణి తయారు చేసింది ఎవరు? ఆ బ్రహ్మ రాక్షసి కాదా? ఆ రోజు సోవియట్ యూనియన్ విచ్చిన్నం అవసర మైన రోజు దేవదూతగా కనిపించిన వాడు నేడు తన దాకా వచ్చేసరికి రాక్షసుడు గా మారాడు. రాక్షస సంహారం జరిగినందుకు అమెరికా అంతటా సంబరాలు జరుగు తున్నాయట. సంతోషమే. కానీ అదే అమెరికా ప్రజలు గుర్తు పెట్టుకోవాల్సిన విషయం మరొకటుంది. తమ దేశ ప్రభుత్వం సామ్రాజ్య వాద, వలస వాద ధోరణులను విడనాడక పొతే విధ్వంసం ఈ లాడెన్ తో అంతం కాదు. ఇలాంటి లాడెన్లు ఎందరో పుడుతూనే ఉంటారు, అమెరికా వ్యతిరేకతను తీవ్రవాదంగా మారుస్తూ విధ్వంసాలు సృష్టిస్తూనే ఉంటారు.

అమెరికాలో కనీ వినీ ఎరుగని పెను విధ్వంసం సృష్టించడానికి లాడెన్ కి కేవలం ముగ్గురు పైలట్లు సరిపోయారు. ఒక అగ్ర రాజ్యాన్ని భయకంపితం  చేయడం ఇంత సులువా అని ప్రపంచం మొత్తం ముక్కుమీద వేలు వేసుకున్నారు. కానీ దురదృష్ట వశాత్తూ ఆ సంఘటనతో అమెరికా పాఠాలేవీ నేర్చుకున్నట్టు కనిపించడం లేదు. తన విశృంఖల సామ్రాజ్యవాద, వలసవాద మానవహననాన్ని విచ్చలవిడిగా కొనసాగిస్తూనే ఉంది.

లాడెన్ పాకిస్తాన్లోనే ఉన్నాడని, పాకిస్తాన్ తీవ్రవాదాన్ని పెంచి పోషిస్తుందని ఇండియా ఎంత గోడుపెట్టినా అమెరికా చెవులకు ఆన లేదు. మనమాటలు విననట్టు నటిస్తూ పాకిస్తాన్ తో అంటకాగిన అమెరికా ఇప్పుడు ఆ దేశ రాజధానికి కూతవేటు దూరంలో లాడెన్ ని మట్టు బెట్టామని సిగ్గులేకుండా ప్రకటించు కొంటుంది. గత పదిసంవత్సరాలుగా లాడెన్ పాకిస్తాన్ ఆశ్రయంలో ఉన్న సంగతి అమెరికాకు తెలియదనుకోవాలా? దావూద్ ఇబ్రహీం వంటి తీవ్రవాద బ్రోకర్లకు ఆశ్త్రయం కల్పిస్తున్న పాకిస్తాన్ తో స్నేహం చేస్తున్న  అమెరికా తాను తీవ్ర వాదానికి వ్యతిరేకంగా యుద్ధం చేస్తున్నానని ప్రపంచాన్ని నమ్మించ జూడడం పిల్లి కళ్ళు మూసుకుని పాలు తాగిన చందం. 

బహ్రైన్లో, బర్మాలో ప్రజా ఉద్యమాలు పట్టని అమెరికాకు లిబియా, ఈజిప్టు దేశాలలోని ప్రజాస్వామ్యాల పై ఎందుకంత ప్రేమో అక్కడి నూనె బావుల నడిగితే వివరంగా చెప్తాయి. తన అడుగులకు మడుగులొత్తే  దేశాలు మాత్రమే ప్రజాస్వామ్య దేశాలన్న కొత్త నిర్వచనాన్ని తలకెక్కించు కున్న అమెరికాకు ఆయా దేశాల్లో నడుస్తున్న ప్రజాస్వామ్య ఉద్యమాలు ఎందుకు కనబడతాయి?

దాని కళ్ళకు ఇరాన్ ప్రమోట్ చేస్తున్న తీవ్రవాదం కనబడుతుంది కానీ, ఇండియాకు పాకిస్తాన్ ప్రమోట్ చేస్తున్న తీవ్రవాదం మాత్రం కనబడదు. ఇలాంటి ద్వంద్వ ప్రమాణాలను ఇకనైనా అమెరికా వీడవలసిన అవసరం ఉంది. లేకుంటే ఒకరి తర్వాత మరొక లాడెన్ పుడుతూనే ఉంటారు, ఏదో ఒక రకంగా అమెరికాకు బుద్ధి చెప్తూనే ఉంటారు. 

తమ దేశానికి పూనిన బ్రహ్మ రాక్షసిని వదిలించ డానికి శాంతి కాముకులైన అమెరికన్ ప్రజలే పూనుకోవాలి. లేక పొతే రాక్షసులు పుడుతూనే ఉంటారు, చస్తూనే ఉంటారు.