'వాట్ ఈజ్ గుడ్, వాట్ ఈజ్ బ్యాడ్, చెప్పగలవాడు పుట్టలేదురా...' అన్నాడో సినీ గేయ కవి. ఎంత నిజం!
గుడ్ అంటే ఏమిటి?
సత్యం.
సత్యం అంటే?
నిజం.
నిజం అంటే?
...
మళ్ళీ సత్యానికొద్దాం. సంస్కృతంలో 'సత్' అంటే మంచి అనే అర్థం ఉంది. అంటే మంచి చేసేదే సత్యం, నిజమూను. మళ్ళీ మొదటికోచ్చామా? ఏది మంచి? ఏది చెడు?
మంచి పని అంటే ఏమిటి? మనకు లాభం జరిగితే మంచా? నష్టం జరిగితే చెడా? మనకు నష్టం జరిగినా ఇతరులకు లాభం జరిగితే? దాన్నేమనాలి? ప్రజాస్వామ్య సిద్ధాంతం ప్రకారం ఎక్కువమందికి ఏది లాభం జరిగితే అదే మంచా? మరి తక్కువ మంది విషయమో?
ఉదాహరణకు శ్రీలంకలో తమిళులు తక్కువ శాతం ఉన్నారు. అక్కడి చట్టాలు సింహళులకు మంచి చేసేవిగా ఉన్నాయి. అది మంచేనా?
అంతెందుకు? మనం ఆఫీసులో ఎక్కువ గంటలు పనిచేస్తే ఆఫీసరుకు మంచి. ఇంట్లో ఎక్కువ గంటలు గడిపితే కుటుంబ సభ్యులకు మంచి.
ఇలా ఆలోచించుకుంటూ పోతే... మంచి, చెడుల మధ్యన ఎంత అస్పష్టత దాగి వుందో తెలుస్తుంది. ఈ మంచి, చెడుల గురించిన ఆలోచనలు మనిషి ఆలోచించడం మొదలు పెట్టినప్పటి నుంచి ఉన్నాయనిపిస్తుంది. అన్ని మతాలు, అన్ని ఇజాలు తాము చెప్పేదే మంచి అని బోధిస్తాయి. నిజానికి ఈ మతాలు, ఇజాలు అన్నీ కుడా మంచిని అన్వేషించడం తోటే మొదలయ్యాయి. సమాజంలో అల్లకల్లోల పరిస్థితులు నెలకొన్న ప్రతి సారి, సత్యం కోసం అన్వేషణ జరిపినవారు గొప్ప ప్రవక్తలుగా మారారు. వారి వారి కాలాలకు, అప్పుడున్న సమస్యలకు పరిష్కారాలు కనుగొనడంలో సఫలీకృతులయ్యారు. తాము కనుగొన్న 'సత్యాలను' భావి తరాల కోసం విపులంగా క్రోడీకరించారు. తదనుగుణంగానే ఇప్పుడు సమాజం నడుస్తుంది.
విచిత్రమేమంటే సత్యాన్వేషణలో అందరి గమ్యం ఒకటే. కాని మార్గాలు వేరయ్యాయి. ఎవరికి వారు మాదే సత్యం అంటే మాదే సత్యం అని కలహించు కున్నారు. సంగ్రామాలు, మహా సంగ్రామాలు, ప్రపంచ మహా సంగ్రామాలు సహితం జరిగాయి. కేవలం మాదే సత్యం అని నిరూపించు కోవటానికి! తనకు తెలిసిన సత్యాన్నే ప్రపంచ సత్యంగా మార్చ టానికి. దీంట్లో ఎంతమంది సఫలీకృత మయ్యారో చరిత్ర చదివిన ప్రతి ఒక్కరికీ అర్థమౌతుంది.
నేను చెప్పేదే సత్యం అని ఎవరైనా అంటే అది ఎంత నిరర్థక మైన మాటో ఇప్పుడు గమనించారా? మహా మహులైన ప్రవక్తలు, జ్ఞానుల మాటాలు కుడా నిరంతర సత్యాలు కావని గ్రహించాం. అలాంటప్పుడు మన మాటలు ఎంత? మనం చెప్పే మాటల్లో ఎంత శాతం సత్యం ఉంది? అలాగే ఇతరులు చెప్పే దాంట్లో ఎంతో కొంత సత్యం ఉంటుందని ఎందుకు భావించం?
అలా భావించిన నాడు మన చర్చలు ఎంత అర్థ వంతంగా, గౌరవ పూరితంగా ఉంటాయి? అలాంటి చర్చల వల్ల మాత్రమే విజ్ఞానం పెంపొందడానికి అవకాశం ఉంది తప్ప రాగ ద్వేషాలతో కూడిన చర్చల వల్ల పెద్దగా ఉపయోగం ఉండబోదు.
సత్యానికి ప్రయోజనానికి ముడిపెట్టడం అర్ధం కాకుండా ఉంది. సత్యం మంచి చెడులకు అతీతమైనదని నేను అనుకొంటున్నాను.
ReplyDeleteయేమైనా మంచి విషయం రాసినందుకు అభినందనలు.
సీతారాంరెడ్డి గారు
ReplyDeleteశాశ్వత మైన సత్యమేది లేదనేదే నా అభిప్రాయం. దీని గురించి నా అభిప్రాయాలు మరికొన్ని వ్యాసాల ద్వారా వివరించడానికి ప్రయత్నిస్తాను.
వ్యాఖ్య చేసినందుకు కృతఙ్ఞతలు.