శవ రాజకీయాలు

అనుకోని సంఘటన జరిగింది. రాష్ట్ర ముఖ్య మంత్రి అత్యంత దారుణ మైన పరిస్థితిలో పరమ పదించారు . రాష్ట్రం మొత్తం విషాదంలో మునిగిన సమయంలో మన మంత్రుల ముఖాల్లో విషాదం కంటే రాజకీయం పాలే ఎక్కువగా కనపడ్డం చాలా విషాద కరమైన విషయం.

ఇంతకీ వీరు చెప్పేదేమిటి? జగన్ ముఖ్య మంత్రి కావాలని. కారణం... రాజ శేఖర్ రెడ్డి గారు ఎన్నో ప్రాజెక్టులను మొదలు పెట్టారు. వాటిని పూర్తి చేయడానికి జగన్ అయితే బాగా ఉంటుందట! అప్పుడే సంతకాలతో యాభై మంది లేక్ వ్యూ గెస్ట్ హౌస్ లో మొయిలీకి పత్రం సమర్పించారు. మొత్తం 120 సంతకాలున్నాయని చెప్పినప్పటికీ వచ్చింది మాత్రం యాభై మంది మాత్రమే అని వార్త.

ఇంతకీ ప్రాజెక్టులు పూర్తి కావడానికి జగన్ ఎందుకో? ప్రాజెక్టులు పూర్తి చేయగల ప్రత్యేకమైన క్వాలిఫికేషన్లు అతని దగ్గర ఏమున్నాయో అర్థం కాదు! కొంప దీసి ప్రాజెక్టుల వెనుక ఉన్న మతలబులు సజావుగా కొనసాగడానికి అని కాదు గద!

తమ కిష్ట మైన వారిని ఎవరి నైనా ముఖ్య మంత్రిగా ఎన్నుకునే హక్కు కాంగ్రెస్ ఎమ్మెల్యేల కుంది. వారు నిరభ్యంతరంగా జగన్ నే ఎన్నుకోవచ్చు... లెజిస్లేచర్ పార్టీ మీటింగులో. ఒక వైపు సంతాప దినాలు పూర్తి కాక మునుపే ఎందుకా తొందర? దీన్ని బట్టే ఉహించు కోవచ్చు ముందు ముందు ఎన్ని కుమ్ములాటలు ఉంటాయో! అయినా వీరి చేతిలో ఏముంది? ఏ నిర్ణయమైనా అధిష్టానం తీసుకో వలిసిందే కదా?

ఈ పరిస్థితిలో రోశయ్య ముఖ్య మంత్రి పదవికి సరయిన వ్యక్తి. అతనికి ఉన్న అపార మైన అనుభవం, రాజకీయ చతురత, అర్థిక పరిజ్ఞానం ఈ సంకట పరిస్థితుల లో రాష్ట్రానికి పనికి వచ్చేవే. సంక్షోభ సమయం లో ఈ రెండు రోజులు అతడు వ్యవహరించిన విధానం బాగుంది. మరో వారసత్వ పాలన ప్రజా స్వామ్యాన్ని అవహేళన చేయకూడదని కోరుకోవడం తప్ప ఏమీ చేయలేం.