"ఇప్పుడు సార్ మిమ్మల్ని రమ్మంటున్నారు" బంట్రోతు అరిచాడు తెలంగాణా ఎంపీలకేసి చూస్తూ.
"హమ్మయ్య", అనుకున్నారు ఎంపీలు. ఆంధ్రా ఎంపీలు పొద్దున్నే తమ కళ్ళ ముందే లోపలికి వెళ్ళారు. టిఫిన్లు, భోజనాలు లోపలే అయ్యాయి. సాయంత్రం కాఫీ కూడా అయ్యింది. వారు వెళ్లిపోయి కూడా అరగంట కావస్తుంది.
"నమస్తే సార్". అందరూ ఒకే సారి అరిచారు, లోపలికెళ్ళాక.
"మీకు ఏడున్నర నిమిషాల టైం ఉంది. ఏం చెపుతారో చెప్పండి". సీరియస్ గా అంటూ పెద్దాయన సోఫా మీద పడుకున్నారు. "భిల్లూ నువ్ పనికానియ్".
భిల్లూ ఉలుకూ పలుకూ లేకుండా వచ్చి సార్ కు గడ్డం గీయడం మొదలు పెట్టాడు.
"అన్యాయం సార్, ఆంధ్రా వాళ్ళతో అంత సేపు మాట్లాడారు. మాకు ఏడున్నర నిమిషాలు ఇస్తే ఏం చెప్పగలం?"
"మీరు లోపలికి ఎలా వచ్చారు?"
"అదేంటి సార్! ఎప్పటి లాగే చేతులూపు కుంటూ వచ్చాం."
"మరి వాళ్ళెలా వచ్చారు?"
"వాళ్ళా, చేతుల్లో సూట్ కేసులు పట్టుకొని వచ్చారు." చెప్పారు గుర్తు తెచ్చుకుంటూ.
"ఎలా వెళ్ళారు?"
"చేతులూపుకుంటూ".
"అర్థం అయ్యిందిగా. అదీ తేడా మీకూ వాళ్ళకూ".
చేసేదేం లేక ఎంపీలు చేతులు నలుపుకో సాగారు.
"పోనీ మేం సూట్ కేసులు ఇవ్వకుండా వచ్చే ఎన్నికల్లో గెలవగలరా?"
"ఎలా గెలవగలం సార్? ఇప్పటికే జనం చీకొడుతున్నారు, చవట సన్నాసులమని తిడుతున్నారు".
"మరయితే అన్నీ మూసుకొని వెళ్ళిపొండి".
"వెళ్లలేం సార్" అందరూ ఒకే మారు చెప్పారు. "జనం మమ్మల్ని చూస్తే వాయగొట్టేలా వున్నారు. మీరే ఏదో ఓ మార్గం చెప్పాలి."
"ఆ కాగితంలో ప్రకటన రాసి ఉంది, బయటికి వెళ్లి ప్రెస్ వారి ముందు చదవండి".
---౦౦౦---
మేం అధిష్టానం దగ్గర తెలంగాణా వాదాన్ని బలంగా వినిపించాం.
ప్రత్యేక తెలంగాణా రాష్ట్రం తప్ప వేరే ఏ వికల్పానికి కూడా తెలంగాణా ప్రజలు అంగీకరించరని ఖరా ఖండీగా అధిష్టానానికి తేల్చి చెప్పాం.
అధిష్టానం మామాటలు సావధానంగా ఆలకించింది.
తెలంగాణాపై సరైన సమయంలో సరయిన నిర్ణయం తీసుకుంటామని వారు తేల్చి చెప్పారు.
తెలంగాణా తెచ్చేదీ ఇచ్చేదీ మా పార్టీయేనని ఈ సందర్భంగా ప్రజలకి మీ ద్వారా తెలియజేసు కుంటున్నాం.
జై తెలంగాణా!
Good satire,
ReplyDeleterealistic as well:)