దేవుడికి ఒంట్లో బాగోలేదట

దేవుడికి ఒంట్లో బాగోలేదట!

దైవభక్తులారా, మీరంతా తలో దేవున్ని పూజించండి, ఈ దేవున్ని బ్రతికించమని కోరుతూ. దేవుడైన వాడికి మా పూజలతో పనేంటి అనుకుంటున్నారా? ఒద్దొద్దు, కొత్త దేవుళ్ళకు ప్రజల తోనే పని. ప్రజాదరణే వారి బలం. మీరు పూజలు చేయండి, ఇళ్ళల్లో భజనలు చేయండి, ఎప్పటి మాదిరిగానే. వీలయితే పక్కింటి వారిని కూడా కలుపుకోండి.

మంత్రులారా, మీకు మీ కమీషన్ల వ్యవహారాల్లో క్షణం తీరిక ఉండదని తెలుసు. భోలక్ పూర్ లో మునిసిపాలిటీ నీళ్ళు తాగి కుక్క చావులు చచ్చినా, మన్యసీమలో విషజ్వరాలొచ్చి  వందల మంది చచ్చినా అక్కడికెళ్ళే మాట దేవుడెరుగు, కనీసం అరగంట సమీక్షా సమావేశం ఏర్పాటు చేసే సమయం కూడా మీకు దొరకదని నాకు ముందే తెలుసు. అయినా అడుగుతున్నాను. మీరు వెళ్లి వారాల తరబడి దేవుడి పాదాల చెంతే ఉండండి. ఆయన తిరిగి లేచి తిరిగే దాకా కదలొద్దు, వదలొద్దు. రాష్ట్రం ఏమై పోతుందో అని భయం అవసరం లేదు. నడుస్తూనే ఉంటుంది ముక్కుతూ మూలుగుతూ, మీరున్నప్పుడు ఎలాగో, లేకపోయినా అలాగే. దేవున్ని మాత్రం కంటికి రెప్పలా చూసుకొండి.

ముఖ్యమంత్రిగారూ, మీరు మాత్రం ఎందుకు? రాష్ట్రంలో ఏం వుంది గనక చేయడానికి? వెంటనే వెళ్లి దేవుడి సంగతి చూడండి.

మీడియా మహారాజుల్లారా మీకిదే అవకాశం. కోతికి కొబ్బరి చిప్ప దొరికినా వదులుతుందేమో గాని, మీరెలా వదులుతారు? నిమిషానిమిషానికి అప్డేట్లు ఇస్తూ మీ ప్రతాపం చూపెట్టండి మరి. అలవాట్లో పొరబాటుగా దేవుడు గారి పాత చరిత్రలు తవ్వడానికి ప్రయత్నించేరు జాగ్రత్త! కొత్తదేవుళ్ళకు పాత చరిత్రలుండవ్. ఉన్నా వాటిని పాతరేయాలి. తెలిసిందా? ఇక చూపెట్టండి మీ ప్రతాపం.  

ప్రజలారా, తోటి బ్లాగర్లారా, మీకిదే విజ్ఞప్తి. మీ ధర్మ సందేహాలు, విమర్శలూ కొంతకాలం పక్కన పెట్టండి. దేవుడి గురించి మీ కామెంట్లు మీకుండొచ్చు, కాని ఇది సమయం కాదు. ఒక మనిషి (సారీ, దేవుడు) అనారోగ్యంతో బాధ పడుతున్నప్పుడు వీలైతే సానుభూతి చూపండి. లేకుంటే ఊరుకోండి. అంతే కాని మీ ధర్మసందేహాలతో, దేవుడికి, ఆయన భక్తులకి ఇబ్బంది కలిగించకండి. అర్థమైందా?