కసబ్ కి ఉరిశిక్ష తక్కువా?

కసబ్ కి ఉరిశిక్ష విధిస్తూ కోర్టులో తీర్పు వెలువడిన దరిమిలా రక రకాల వాదనలు వినిపిస్తున్నాయి. కొందరు ఈ శిక్ష సరిపోదని, అసలు ఖండ ఖండాలుగా నరికి కాకులకు, గద్దలకు వేయాలని; మరికొందరు చావనీయ కుండా, బ్రతుకు అంటే అసహ్యం కలిగేలా చిత్ర హింసలు పెట్టాలని; ఇంకొందరు ముస్లిం ఆచారాల ప్రకారం అంతిమ క్రతువు నిర్వ హించక పోతే సరిపోతుందని ఇలా రక రకాలుగా చెప్తున్నారు.

అసలు కసబ్ ఎవరు? పాకిస్తాన్ లోని ఒక దరిద్రుల కుటుంబంలో జన్మించాడు. దారిద్ర్యం, అపరిమిత సంతానం అవిద్యకు, మూర్ఖత్వానికి దారి తీసాయి.  దుర్భర దారిద్ర్యం నేర ప్రవృత్తికి, దొంగ తనాలకు పురికొల్పింది. ఇలాంటి వారు టెర్రరిస్టులని తయారు చేసే ముష్కర మూకలకు శ్రేష్టమైన ముడిసరుకు అవుతారనేది జగమెగిన సత్యమే. చాలా సహజంగానే వారు ఇతన్ని తమ గుంపులోకి లాగారు. అందుకు ప్రతిఫలంగా ఇతని తండ్రికి డబ్బు ముట్టిందని కూడా వార్తలు ఉన్నాయి.

చదువు, సంస్కారం లేని యితడు ఇస్లామిక్ తీవ్రవాద సాహిత్యాన్ని ఔపోశన పట్టి కరడు గట్టిన టెర్రరిస్టుగా మారాడని అనుకోలేం. ఇన్ని రోజుల విచారణలో కూడా ఈ విషయం తెలుస్తుంది. కసబ్ ఎన్నోసార్లు రక రకాల అబద్ధాలు చెప్పాడు. తానూ టెర్రరిస్టు కాదని, టూరిస్టు అని బుకాయించ బోయాడు. శిక్ష ఖరారైన తర్వాత కూడా ఏడ్చాడని తెలుస్తోంది. కరడు గట్టిన టెర్రరిస్టు అయితే, నమ్మిన దానికోసం చావడాన్ని గర్వంగా భావిస్తాడు. జిహాద్ కు సంబధించిన నినాదాలు ఇవ్వడానికి ప్రయత్నిస్తాడు. 

ఛత్రపతి శివాజీ టర్మినస్ లోపల ఇతను జరిపిన మారణ కాండకు తప్పకుండా ఉరిశిక్ష పడాల్సిందే. వేయడానికి మన శిక్షా స్మృతి లో అంతకన్నా పెద్ద శిక్ష కూడా లేదు. నిజానికి ఇతనికి శిక్ష విధించే విషయంలో ఇంతటి భావోద్వేగాలకు గురి కావాల్సిన అవసరం లేదు. నిజానికి మొత్తం వ్యవస్థలో కసబ్ ది ఒక పిపీలిక మాత్రమైన పాత్ర మాత్రమే.

మనం మన దేశం లోనే రహస్యంగా నడుపుతున్న తీవ్రవాద శిక్షణా వ్యవస్థని రూపు మాప లేక పోతున్నాం. POK  లో, సరిహద్దుల లో ఉన్న  తీవ్ర వాద స్థావరాలని నాశనం చేయడానికి అంతర్జాతీయ మద్దతును కూడగట్ట లేక పోతున్నాం. కనీసం అమెరికా వ్యతిరేక ఇస్లామిక్ టెర్రరిజం, ఇండియా వ్యతిరేక టెర్రరిజం ఒకటే అని అమెరికాని కన్విన్స్ చేయ లేక పోతున్నాం. ఇవన్నీ ఎవరి వైఫల్యాలు?

ఇంతెందుకు? కనీసం టెర్రరిస్టులపై ప్రాణాలర్పించి పోరాడుతున్న పోలీసులకు సప్లయ్ చేసే బుల్లెట్ ప్రూఫ్ ల విషయం లో కూడా లాలూచీ పడుతున్నాం. సాక్షాత్తూ పార్లమెంటు పై దాడి చేసి అయిదు వందల నలభై మంది ఎంపీలను అదుపులోనికి తీసుకోవాలని ప్రయత్నిచినవారిని ఐదు సంవత్సరాలుగా ఉరి తీయకుండా ఉపేక్షిస్తున్న వారిని ఏం చేయాలి? లుంబినీ పార్కు, గోకుల్ చాట్లో జరిగిన మారణ కాండకు ఇప్పటివరకు విచారణలో పురోగతి లేక పోవడానికి కారకు లెవ్వరు? 

మన దేశంలో అనేక దారుణాలకు పాల్పడుతున్న దావూద్ ఇబ్రహీం దగ్గరుకు వెళ్లి బహిరంగంగా విందులు చేసి వచ్చే బడా బాబులను ఏం చేయాలి?

ఇలా చెప్పుకుంటూ పోతే ఎన్నో. కేవలం కసబ్ ని అత్యంత దారుణంగా చంపి రాక్షసానందం పొందడం అనేది, తాత్కాలికంగా ఉపశమనం కలిగించ వచ్చు, కాని ఆ ఆనందం అసలు విషయాలన్నీ మరుగున పడి పోవడానికి మాత్రమే ఉపయోగ పడుతుంది. ఇలా ఎప్పటికప్పుడు జరిగిన విషయాలని మరిచి పోయి మళ్ళీ మళ్ళీ మోసపోవడం, తిరిగి ఏదో ఒక దాడి జరగ్గానే భావోద్వేగాలకు లోను కావడం మనకేమీ కొత్త కాదుగా.