పదో తరగతి చదివేటప్పుడు తెలుగు టీచర్ అనంతాచార్యుల వారు చందస్సు నేర్పించారు. ఆ సందర్భంగా ఆటవెలది పద్యాన్ని బోధిస్తూ, ఒక పద్య పాదాన్ని ఇచ్చి పూరించమని చెప్పారు. అది...
'ఆట వెలదు లెల్ల నాటాడు నప్పుడు'
చందస్సు నేర్చుకున్న ఆనందంతో సమధికోత్సాహంతో ఇలా పూరించాను.
ఆ. వె. | ఆట వెలదు లెల్ల నాటాడు నప్పుడు పాడునపుడు మనము పరవశించి మేను పులకరించి మేఘ మధ్యంబునం దాటలాడుచున్న యట్లు దోచు |
తర్వాత ఇంగ్లీషు మీడియం చదువు, సాంకేతిక విద్య కావడంవల్ల పద్యాల గురించి పూర్తిగా మరిచే పోయాను. మళ్ళీ ఇలా బ్లాగులోకం లోకి వచ్చిన తర్వాతనే పద్యాలు రాయడానికి ప్రయత్నం చేశాను. చింతా రామకృష్ణా రావుగారి ఆశీర్వచనం, ఆచార్య ఫణీంద్ర గారి వద్ద శిష్యరికం, కండి శంకరయ్య గారి ప్రోత్సాహం లేకుంటే జీవితంలో మళ్ళీ ఎప్పుడూ పద్యం రాసి ఉండే వాడిని కాదంటే అతిశయోక్తి కాదేమో. ఈ సందర్భంగా వివిధ బ్లాగులలో నేను వ్రాసిన కొన్ని పద్యాలు.
ఆ. వె. | ఆశ లేని బ్రతుకు అడవిలో వెన్నెల ఆశ యందె కలుగు ఆశయములు ఆశ యుండు టెల్ల అత్యాశ కాబోదు ఆశ లోనె కలదు దేశ భవిత |
చం. | సరుకులు కొందమన్న మరి చాలవు జీతపు డబ్బు లేటికిన్ తిరుగుద మన్న రోడ్లపయి తిప్పలు తప్పవు పాటు హోల్సుతో ఎరుగము నీటి పంపు ప్రతి యింటికి తప్పక వచ్చు రోజులన్ మరతుము వీటినన్నిటిని మానము వేతుము వోటువారికే |
మ. | జలమోయంచును చేయు పూజలకు కాస్తంతన్ దయే లేని ఆ కలియే నాట్యము చేసెనా యనగ, పొంగారెన్ నదీ మాతలే ! కలలోనైనను గాంచ నోపుదుమె ’ హా ’ కారాల ఆర్త ధ్వనుల్ ? జలమే రాక్షసియై ప్రజావళి నయో ! సంహారమున్ సల్పెనే ! |
తే. గీ. | బియ్య మదిజూడ నింగితో నెయ్యమందు కూరగాయలా అరపూట గూడరావు ధరల గతిజూడ దడపుట్టు ధరణిలోన పప్పు కొనబోవుటే పెద్ద తప్పు నేడు ! |
కం. | అసమర్థు లాడు వాండ్రని నసిగెడు వారెల్ల రింక నచ్చెరు వందే దెస సోనియ ’ప్రతిభ’ను లో క సభాధ్యక్షతను పొందె కాంతామణియే. |
ఉ. | 'సీమ'ను క్షామ మెక్కువని చెప్పుచు కొందరు; కాదు కాదు మా సీమన క్షామ మెక్కువని చెప్పెద రింకొక ప్రాంత నాయకుల్; క్షామము తాండవించుటకు కారణ మౌచును, సిగ్గు లేకయున్ క్షామము బ్రోచుచుండుటనె గౌరవ మొందుట; సత్యమిద్ధరన్. |
కం. | బాధను విలవిల లాడె వి రాధుడు గాయము లగుటను రాముని వలనన్ క్రోధము నంతట వీడి వి రాధా! యిటు రమ్మటంచు రాముఁడు పిలిచెన్. |
ఉ. | తీయని మాటలాడుచును ధీమతి వోలెను పోజు బెట్టుచున్ మాయలు చేయువాడొకడు, మై నలుపై నొకడొప్పు తక్కువై గాయపు మచ్చలుండినను గుణ్యత గల్గిన వాడు గావుటన్ రోయకఁ బెండ్లియాడెను కురూపిని చక్కని చుక్క ప్రేమతో. |
ఆ. వె. | పడకటింటగూడ ప్రాజెక్టు పనులాయె తెల్లవారుదాక తీరదాయె ఝాము పొద్దు కాగ జవరాలు నీవంటు వేళ కాని వేళ బిలువ దగునె |
కం. | చూపెన్ పడతుల సొంపులు ఆపయి వయలెన్సు నింపి ఔరా యనగన్ చూపెను దుబాయి లండన్ సూపరు హిట్ చిత్రము కయి సుతుడే కోరన్ |
తే. గీ. | మాటి మాటికి ఫోనులో మంతనాలు తప్పు కొనవలెనన్న యేదారి లేక కాన్ఫరెన్సు యుందని చెప్పి కల్ల లాడ సెల్లుఫోను లసత్యముల్ జెప్ప నేర్చె |
ఆ. వె. | జబ్బు చేసినంత డబ్బు సాయ మడుగ ప్రాణ మిత్రుడొకడు పారి పోయె వైరిగా తలచిన వాడు సాయ పడిన ధనమె గొప్ప మంచితనము కంటె. |
ఆ. వె. | ఫాక్షనిజము సల్పి పలు నేరముల జేసి పదవి వచ్చినంత ఫ్రాడు జేసి తాను జచ్చినంత తనయుడు అరుదెంచి పేరు లేనివాఁడు పేర్మిఁ గనెను. |
తే. గీ. | ధనము కలిగిన మనసుకు తృప్తి లేదు కొంత యుండిన మరియింత కోర నగును తనను మించిన కలుగును తామసంబు కలిమి యెడబాసి నప్పుడే కలుగు సుఖము. |
మరిన్ని ఇంకో టపాలో...
మీరు చాల బాగా పద్యరచన గావిస్తున్నారు.
ReplyDeleteశంకరాభరణం బ్లాగులో మీరుచెసిన కొన్ని పూరణలు నాకు అద్భుతంగా తోచాయి.
పద్యలాతో కుస్తీ ల్లో పెద్ద వస్తాదు కావాలని అభిలషిస్తున్నాను
అసంఖ్య గారు,
ReplyDeleteమీ ప్రోత్సాహానికి ధన్యవాదాలు.
బాగున్నాయి.
ReplyDeleteచివరి తేటగీతి " ధనము గలిగిన" చాలా బాగుంది.
మందాకినీ గారు,
ReplyDeleteధన్యవాదాలు.
హరి గారూ,
ReplyDeleteమంచిమంచి పద్యాలు రాస్తున్నారు. మీ పద్యాలు అర్థవంతంగాను, పాడుకోటానికి వీలుగానూ ఉంటాయి. పదాలను అతికించినట్టు ఎక్కడా కనబడదు. అభినందనలు!
మీ బ్లాగు కూడళ్ళలో కనబడుతున్నట్టు లేదేంటి సార్?
ReplyDeleteచదువరి గారు,
ReplyDeleteమే అభినందనలకు ధన్యవాదాలు.
నా బ్లాగు కూడలి, హారం, మాలికలలో ఇండెక్స్ అవుతుందండి.
చదువరి గారు,
ReplyDeleteమీ పద్యాలు ఇంకా బాగుంటాయి.
పద్యాలు చాలా బాగున్నాయి. అభినందనలు.
ReplyDeleteనచికేత్ గారు
ReplyDeleteదన్యవాదాలు