హైదరాబాదులో ఇరానీ హోటల్ కి వెళ్ళే వారికి ఉస్మానియా బిస్కట్లు తప్పకుండా తెలిసే ఉంటుంది. ఈ బిస్కట్లను ఇంట్లో తయారు చేయాలని ఎప్పటినుండో అనుకుంటున్నాను. ఇంటర్నెట్లో వెతికినా కూడా సరయిన సమాచారం లభించలేదు. అక్కడకొంతా, ఇక్కడ కొంతా సమాచారం సేకరించి మొత్తానికి బిస్కట్లు తయారు చేసాను. రుచి మొత్తానికి ఉస్మానియా బిస్కట్లకు దగ్గర దగ్గరగా వచ్చింది. వాటితో పోల్చుకోకుంటే మాత్రం బాగా టేస్టీగా వచ్చాయని చెప్పొచ్చు. కావాలంటే మీరు కూడా తయారు చేసుకోవడానికి కింద తయారీ విధానం ఇచ్చాను.
కావలసిన పదార్థాలు:
కావలసిన పదార్థాలు:
మైదా పిండి | 150 గ్రా |
బియ్యం పిండి | 50 గ్రా |
చక్కెర | 75 గ్రా |
ఉప్పు | చిటికెడు |
ఏలకులు | రెండు |
లవంగాలు | రెండు |
దాల్చిన చెక్క | ఒక ముక్క |
పాలు | కలపడానికి తగినన్ని |
కుకింగ్ బటర్ లేదా నెయ్యి | 50 గ్రా |
గ్రుడ్డు | ఒకటి (పచ్చసొన మాత్రమే) |
బేకింగ్ సోడా | చిటికెడు |
బేకింగ్ సాల్ట్ | చిటికెడు |
తయారు చేసే విధానం:
ముందుగా ఏలకులు, లవంగాలు, దాల్చిన చెక్క మెత్తగా నూరుకోవాలి. చక్కెర కూడా పెద్ద స్ఫటికాలుగా ఉంటే దాన్ని కూడా మెత్తగా నూరుకోవాలి. పైన చెప్పిన పదార్థాలన్నీ కలిపి పిండి మృదువుగా వచ్చె వరకు పిసుక్కోవాలి. గ్రుడ్డు వేసేటప్పుడు మాత్రం పచ్చ సొన మాత్రమే వేయండి. రెండూ కలిపి వేస్తే నీసు వాసన వచ్చే అవకాశం ఉంది. పిండి చపాతి పిండి మాదిరి గట్టి తనంతో ఉండాలి. ప్లాట్ ఫారం మీద పొడి పిండి వేసి (అంటుకోకుండా ఉండడానికి) రొట్టెల కర్రతో పావు అంగుళం మందం వచ్చేటట్టుగా వత్తుకోవాలి. తర్వాత ఏదైనా ఒకటిన్నర అంగుళాల వ్యాసం కలిగిన గ్లాసు లాంటి పాత్ర ఉపయోగించి బిస్కట్లుగా కట్ చేసుకోవాలి. ఇతర షేపుల్లో కావాలంటే కత్తితో కట్ చేసుకోవాలి. లేదా రకరకాల షేపులు మార్కెట్లో దొరుకుతాయి.
తర్వాత బేకింగ్ ట్రే తీసుకుని దానికి నూనె రాసుకోవాలి. ఆ నూనెకి అంటేలా పొడిపిండి చల్లాలి. బిస్కట్లను ట్రే లో అమర్చుకోవాలి.
బేకింగ్ చేసే విధానం:
ముందుగా ఓవెన్ ని 170 డిగ్రీల సెంటిగ్రేడ్ ఉష్ణోగ్రత వద్ద ప్రీ-హీట్ చేసుకోవాలి. తర్వాత బిస్కట్లు పెట్టి 170 డిగ్రీల సెంటిగ్రేడ్ ఉష్ణోగ్రత వద్ద 12 నుండి 14 నిమిషాలు బేక్ చేయాలి. బేక్ అయిన బిస్కట్లను ఫ్యాను క్రింద పది నిమిషాలు ఆరబెట్టి తర్వాత డబ్బాలో నిలువ చేసుకోవాలి.
మరి తయారు చేసి చెప్తారు కదా, ఎలా ఉన్నాయో. ఇంకేమైనా మార్పులు, చేర్పులు, సలహాలు ఉంటే క్రింద కామెంట్ల రూపంలో రాయండి.
దాంక్స్. నేను ఇవి చేసేసి ఎలా ఉన్నాయో చెప్తాను. నాకు ఉస్మానియా బిస్కట్లంటే చాలా ఇష్టం.
ReplyDeleteధన్యవాదాలండీ జ్యోతి గారు. మీరు చేసాక మార్పు చేర్పులుంటే తప్పక సూచించండి.
ReplyDeletehttp://appalaraj.blogspot.com/2011/02/blog-post.html
ReplyDeleteనాక్కూడా ఇవి చాలా ఇష్టం. నేను మా ఆవిడను బతిమాలి ఒప్పించాను. పైన చెప్పిన విధానం చాలా సులభంగానే అగుపించిందట మరి. చూద్దాం.
ReplyDelete